Asina lo treslladó a los medios dempués de reunise cola conseyera d'Infraestructures, Ordenación del Territoriu y Mediu Ambiente, Belén Fernández, y el delegáu del Gobiernu, Gabino de Lorenzo. Vázquez aseguró amás que Renfe prevé invertir un total de 34 millones d'euros.

En concreto, 23 millones van distribuyise ente los años 2016, 2017 y 2018 pa invertir en meyores nel caltenimientu de los trenes d'anchu métricu -los trenes de cercaníes-. Los once restantes van dir destinaos a meyorar los servicios n'estaciones igual de FEVE -seis millones-, como Renfe -5 millones-, en materia d'accesibilidá o megafonía.

Pela so parte la conseyera mostró la so satisfacción a la salida de la xunta polos compromisos alquiríos por Renfe. "Magar qu'en feches pasaes poníamos de manifiestu la nuesa absoluta desaprobación a les cancelaciones masives de servicios, güei tenemos que congratulanos de la respuesta y pol compromisu firme de Renfe de poner frenu de manera definitiva a la secuencia de cancelaciones", señaló.